Este proxecto da Fundación Pontetec está dirixido ós nenos e nenas en idade escolar. Como sabemos, o fútbol é o deporte maioritario no noso país, pero ademais de ter o maior número de adeptos, trátase dunha actividade motivadora e ó mesmo tempo formativa, capaz de desenvolver a autonomía persoal e as relacións interpersoais.

Así pois, partimos de:
- A experiencia do Pontevedra C.F. na organización, promoción e difusión da práctica deportiva.
- Recuperar as prácticas deportivas evitando o sedentarismo e os estilos de vida non saudables.
- A involucración de pais e institucións que apoien o noso proxecto.
- Recursos humanos cualificados, derivados de acordos entre a Universidade de Vigo e o noso clube.

As escolas divídense en dous grupos de idade:
ESCOLAS DE PREDEPORTE: Enfocadas a rapaces e rapazas de entre 6 e 9 anos, nas que se han desenvolver as actividades motrices básicas fundamentadas no xogo.
ESCOLAS DEPORTIVAS: Para rapaces e rapazas de entre 9 e 12 anos, a través dunha práctica regulada e institucionalizada, e baseadas nunha compoñente lúdica e saudable.

As nosas escolas serán máis que fútbol, pois nelas combinarase a práctica deste deporte con xogos motores e tradicionais (carreiras de sacos, a corda, o pano, etc.). Por último e non menos importante está o labor de inculcar ós nenos e nenas valores como a deportividade, o respecto, o esforzo e afán de mellora e superación.